ສສຊ ແລະ ສສຂ ເຂດ 15 ຊີ້ແຈງບາງບັນຫາທີ່ປະຊາຊົນສະເໜີ

28/09/2017 00:00 -

          (ສພຊ) ​ເມື່ອ​ຕົ້ນ​ເດືອນ​ກັນຍາ​ຜ່ານ​ມາ, ທ່ານ ນາງ ປິ່ງຄໍາ ລາຊະສີມມາ ຮອງປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 15 ແຂວງຈໍາປາສັກ ພ້ອມດ້ວຍທ່ານ ປະດິດ ວັນນະລັດສະໝີ ສະມາຊິກສະພາປະຊາຊົນແຂວງ (ສສຂ) ຈຳປາສັກ ປະຈໍາເຂດເລືອກຕັ້ງເມືອງປະທຸມພອນ, ທ່ານ ບຸນໂຮມ ສີພັນດອນ ຮອງຫົວໜ້າຫ້ອງວ່າການປົກຄອງເມືອງປະທຸມພອນ, ຕາງໜ້າຄະນະພັກຮາກຖານກຸ່ມບ້ານ, ປະທານກຸ່ມບ້ານ, ອຳນາດການປົກຄອງບ້ານຂອງເມືອງປະທຸມພອນ, ພະນັກງານວິຊາການຈາກສະພາແຫ່ງຊາດ (ສພຊ) ແລະ ສະພາປະຊາຊົນແຂວງ (ສພຂ) ຈໍາປາສັກ ໄດ້ລົງເຄື່ອນໄຫວເຜີຍແຜ່ຜົນສຳ​ເລັດ​ກອງປະຊຸມສະໄໝສາມັນເທື່ອທີ 03 ຂອງ ສພຊ ຊຸດທີ VIII ແລະ ຂອງ ສພຂ ຈໍາປາສັກ ​ໂດຍມີພະນັກງານ-ລັດຖະກອນ, ທະຫານ-ຕໍາຫລວດ, ນັກຮຽນ-ນັກສືກສາ ແລະ ພໍ່​ແມ່ປະຊາຊົນ ເຂົ້າຮ່ວມຮັບຟັງທັງໜົດ 1.190 ຄົນ ຍິງ 676 ຄົນ.

​ໃນລົງການ​ເຄື່ອນ​ໄຫວ​, ​ຄະນະ​ໄດ້ລົງ​ຢູ່ 6 ຈຸດຄື: ຫ້ອງວ່າການປົກຄອງເມືອງປະທຸມພອນ; ວິທະຍາໄລການເງິນພາກໃຕ້; ບ້ານເຜົ່າສໍາພັນ; ກຸ່ມບ້ານນໍ້າອ້ອມ ມີ 6 ບ້ານ ຄື: ນໍ້າອ້ອມ, ເຫລົ່າຫຍ້າ, ສົມສຸກ, ນາບອນ, ຫ້ວຍຕ້ອນ, ​ແລະ ໜອງເອກ; ບ້ານພະລາຍ; ກຸມບ້ານປະທຸມພອນ ມີ 14 ບ້ານຄື: ບ້ານແຊງ, ປາກຕວຍ, ຄອນນ້ອຍ, ໂຕະໂໝະທ່າ, ຫລັກ 40, ໜອງບຶງ, ນາກອກ, ນາຂາມ, ນາລານ, ທ່າຮຸ, ທາງແບ່ງ 48, ໜອງແຂ້, ປະທຸມພອນ, ​ແລະ ຫ້ວຍໃຜ່.

          ຜ່ານການລົງເຄື່ອນໄຫວຕົວຈິງຂອງ ສສຊ ແລະ  ສສຂ ​ເຫັນ​ວ່າ​ໄດ້​ຮັບການຮ່ວມມືເປັນຢ່າງດີຈາກ​ທຸກ​ພາກສ່ວນ ​ເຊິ່ງຜູ້​ເຂົ້າ​ຮ່ວມ​ໄດ້ໃຫ້ຄວາມສົນໃຈ, ເຂົ້າໃຈແຈ້ງຂຶ້ນ​ຕື່ມຕໍ່ບັນດາເນື້ອໃນທີ່ນຳ​ມາ​ເຜີຍແຜ່​ໃນ​ຄັ້ງ​ນີ້; ນອກນັ້ນ,ຜູ້ເຂົ້າຮ່ວມຍັງ​ໄດ້ສະເໜີ ແລະ ຊັກຖາມຕໍ່ ສສຊ ແລະ ສສຂ ຫລາຍ​ບັນຫາ​ ​ເປັນ​ຕົ້ນ​ແມ່ນບັນຫາການຊົດເຊີຍປະຊາຊົນທີ່ຖືກຜົນກະທົບຈາກການຂະຫຍາຍ ແລະ ກໍ່ສ້າງອາຄານຂອງວິທະຍາໄລການເງິນພາກໃຕ້, ການອອກອະນຸຍາດໃຫ້ສະຖານບັນເທິງ, ໂຕະສະນຸກເກີ້ ເປີດກິດຈະການໃກ້ກັບສະຖານການສຶກສາ, ການຈັດສັນຄົນຈີນ, ຄົນຫວຽດນາມ ທີ່ຫາບເຄື່ອງເລາະຂາຍຕາມຕົວເມືອງ ແມ່ນຍັງບໍ່ທັນໄດ້ຮັບການຈັດສັນໃຫ້ເປັນລະບຽບ ແລະ ປະຕິບັດຕາມກົດໝາຍ ແລະ ລະບຽບການທີ່ໄດ້ກໍານົດໄວ້ແລ້ວ, ລາຄາກາເຟຕົກຕໍ່າ, ສະເໜີໃຫ້ພາກສ່ວນກ່ຽວຂ້ອງລົງໄປກວດກາ ແລະ ຈັດສັນຄືນກ່ຽວກັບປະຊາຊົນທີ່ຕັ້ງເຮືອນ ແລະ ຕັ້ງຮ້ານຂາຍເຄື່ອງກວມເອົາທາງຍ່າງ ຢູ່ທາງເລກທີ 13 ເໜືອ ເຂດບ້ານໂພນງານ, ຜູ້ປະກອບການຄົນຈີນລ້ຽງປາກະຊັງໃຫຍ່ໄວ ແລະ ກົດລາຄາປາ, ບໍລິສັດຊີພີ ມາດໍາເນີນກິດຈະການລ້ຽງໝູ ກົດລາຄາ ແລະ ບີບໃຫ້ຜູ້ປະກອບການຂະໜາດນ້ອຍຫລຸດອອກຈາກຕະຫລາດ, ຊົດເຊີຍຜົນກະທົບການກໍ່ສ້າງພື້ນຖານໂຄງລ່າງຂອງແຂວງ, ຄ້າຍຄຸມຂັງແຂວງປ່ອຍນໍ້າເປື້ອນລົງຄອງລະບາຍນໍ້າຜ່ານເຮືອນປະຊາຊົນຢູ່ບ້ານໂນນສະຫວ່າງ ເມືອງປາກເຊ ແຂວງຈໍາປາສັກ, ຂໍງົບປະມານນຳໃຊ້ເຂົ້າໃນການກໍ່ສ້າງ ແລະ ຂະຫຍາຍຫ້ອງການບ້ານໃຫ້ໄດ້ມາດຕະຖານ, ກໍ່ສ້າງ ແລະ ຂະຫຍາຍເສັ້ນທາງ, ລາຄາມັນຕົ້ນ ແລະ ໝາກມ່ວງຫີນມະພານຕົກຕໍ່າ ແລະ ບໍ່ມີຕະຫລາດຮອງຮັບຜົນຜະລິດທີ່ໜັ້ນຄົງ, ໃຫ້ສືບຕໍ່ກໍ່ສ້າງຄອງຊົນລະປະທານໃຫ້ສໍາເລັດໂດຍໄວ, ປ່ຽນໝໍ້ແປງໄຟຟ້ານ້ອຍຂະໜາດ 100 KVA ມາເປັນ 250 KVA, ຄ່າຊົມໃຊ້ໄຟຟ້າຂອງປະຊາຊົນແມ່ນເຫັນວ່າມີລາຄາແພງຜິດປົກກະຕິ,  ສະໜອງທຶນ ເຮັດບັກຂ້າມນໍ້າ, ຝາຍນໍ້າລົ້ນຢູ່ຫ້ວຍຕາເອື່ອງ ແມ່ນເຮັດໃຫ້ມີນໍ້າຖ້ວມເນື້ອທີ່ທໍາການຜະລິດຂອງປະຊາຊົນຈໍານວນ 6 ຄອບຄົວ, ພະນັກງານຄູອາຈານທີ່ເປັນອາສາສະໜັກຍັງບໍ່ທັນໄດ້ຮັບໂກຕາລັດຖະກອນ, ຂໍຊົນລະປະທານ, ຂໍສຸກສາລາ,ເອກະຊົນໄດ້ຮັບການສໍາປະທານສະຖານທີ່ທ່ອງທ່ຽວວັດພູຈໍາປາສັກ ສະເໜີຊ່ວຍຄົ້ນຄວ້າແກ້ໄຂ ຫລື ໃຫ້ບ້ານໄດ້ມີລາຍຮັບຄືໄລຍະຜ່ານມາ, ການ​ເສຍ​ພາສີດິນບໍ່ຖືກຕ້ອງຕາມລະບຽບ ແລະ ກົດໝາຍ, ກໍ່ສ້າງ ແລະ ຂະຫຍາຍຫ້ອງຮຽນ ເນື່ອງຈາກຫ້ອງຮຽນທີ່ມີໃນປັດຈຸບັນແມ່ນແອອັດຫລາຍ; ພ້ອມດຽວກັນນັ້ນ, ກໍໃຫ້ຊ່ວຍລະດົມພໍ່ແມ່ປະຊາຊົນໃຫ້ຊຸກຍູ້ສົ່ງເສີມໃຫ້ລູກຫລານໄປໂຮງຮຽນ.

          ສສຊ ແລະ ສສຂ ກໍຊີ້ແຈງໃຫ້ຄວາມກະຈ່າງແຈ້ງບາງ​ບັນຫາ ​ເຊັ່ນ: ການສະເໜີຂໍກໍ່ສ້າງ, ສ້ອມແປງ ແລະ ຂະຫຍາຍເສັ້ນທາງຮ່ອມເຂົ້າບ້ານ ແມ່ນຕ້ອງໄດ້ເກັບກໍາຂໍ້ມູນຕົວຈິງຢ່າງລະອຽດ ແລະ ເອົາເຂົ້າໃນແຜນການຂອງເມືອງ, ແຂວງ, ສະນັ້ນ ບ້ານ, ປະທານກຸ່ມບ້ານ ຕ້ອງໄດ້ປະສານສົມທົບກັນເກັບກໍາຂໍ້ມູນ ແລະ ນໍາສະເໜີຂັ້ນເມືອງ, ແຂວງ ຕາມລໍາດັບ ເພື່ອສະເໜີງົບປະມານປົກກະຕິຂອງເມືອງ, ຂອງແຂວງ ເພື່ອໃຊ້ເຂົ້າໃນການກໍ່ສ້າງ, ສ້ອມແປງ ແລະ ຂະຫຍາຍເສັ້ນທາງຊອຍເຂົ້າບ້ານ; ສໍາລັບການສະເໜີຂໍສຸກສາລາຢູ່ບ້ານ ເຫັນວ່າກຸ່ມບ້ານແມ່ນກໍມີສຸກສາລາແລ້ວ ແຕ່ວ່າບັນຫາຕົ້ນຕໍກໍຄືເສັ້ນທາງໄປຍາກມາຍາກ, ສະນັ້ນ ຖ້າເຮົາມີການປັບປຸງ ຫລື ແກ້ໄຂບັນຫາເສັ້ນທາງໄດ້ ບັນຫາສຸກສາລາກໍຈະຖືກແກ້ໄຂໄປໃນຕົວ; ສ່ວນຂໍໝໍ້ແບ່ງໄຟຟ້າໃໝ່ຜ່ານມາ ສສຂ ແມ່ນໄດ້ປະສານສົມທົບກັບຂະແໜງການທີ່ກ່ຽວຂ້ອງ ເພື່ອຄົ້ນຄວ້າ ແລະ ເອົາເຂົ້າໃນແຜນການປະຈໍາປີແຕ່ລະປີແລ້ວ ພາກສ່ວນກ່ຽວຂ້ອງຂອງແຂວງກໍກໍາລັງຄົ້ນຄວ້າງົບປະມານເພື່ອໃຊ້ເຂົ້າໃນການປ່ຽນໝໍ້ແບ່ງໄຟຟ້າໃນແຕ່ລະບ້ານທີ່ເຫັນວ່າຍັງມີໝໍ້ແບ່ງນ້ອຍ ແລະ ກະຈ່າຍໄຟຟ້າໃຫ້ປະຊາຊົນຊົມໃຊ້ບໍ່ພຽງພໍ; ຕໍ່​ກັບ​ລາຄາຜົນຜະລິດກະສິກໍາຕົກຕໍ່າ; ຜູ້ສັນຈອນ ແລະ ຜູ້ນໍາໃຊ້ພາຫະນະຢູ່ແຂວງຈໍາປາສັກ ທີ່ບໍ່ປະຕິບັດຕາມການສັນຈອນ ແລະ ບໍ່ປະຕິບັດຕາມກົດໝາຍ ເຊິ່ງເຮັດໃຫ້ມັກເກີດອຸບັດຕິເຫດຕາມທ້ອງຖະໜົນ; ບັນຫາການອະນຸຍາດໃຫ້ສະຖານບັນເທິງ, ໂຕະສະນຸກເກີ້ ເປີດກິດຈະການໄກ້ກັບສະຖານການສຶກສຶກສາ ​ແລະ ອື່ນໆ ​ເຊິ່ງ​ໄລຍະຜ່ານມາພະແນກການທີ່ກ່ຽວຂ້ອງກໍໄດ້ເອົາໃຈໃສ່ໃນການຕິດຕາມກວດກາ ແລະ ວາງແຜນການແກ້ໄຂ ​ແຕ່​ບັນຫາ​ຕ່າງໆ​ທີ່​ຍັງ​ຄ້າງ​ຄາ​ນີ້ ແມ່ນຈະໄດ້ນໍາເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 03  ຂອງ ສພຊ ຊຸດທີ VIII ແລະ ສພຂ ຢ່າງເປັນທາງການ.

(ນາງ ປາ​ກາ​ລັກ ພົມ​ມີ​ໄຊ)