ລາຍການ

ເຂົ້າສູ່ລະບົບ



ຈຳນວນຜູ້ເຂົ້າເບິ່ງເວັບໄຊ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
ເລີ່ມນັບຈາກວັນທີ 28/02/2011

ສະພາແຫ່ງຊາດ ຕີລາຄາສະພາບການໂຈະການພິຈາລະນາ ແລະ ອະນຸມັດໂຄງການລົງທຶນໃໝ່

ໃນ 1 ປີ ຜ່ານມາ, ພາຍຫລັງທີ່ມີຄຳສັ່ງນາຍົກລັດຖະມົນຕີ ເລກທີ 03/ນຍ ວ່າດ້ວຍການໂຈະການພິຈາລະນາ ແລະ ອະນຸມັດໂຄງການ ລົງທຶນໃໝ່ ສຳລັບການຊອກຄົ້ນ ແລະ ສຳຫລວດແຮ່ທາດ, ການປູກຢາງພາລາ ແລະ ໄມ້ວິກ ໃນຂອບເຂດທົ່ວປະເທດ, ກະຊວງແຜນການ ແລະ ການລົງທຶນ ກໍຄື ຄະນະສະເພາະກິດ ໄດ້ສົມທົບກັບບັນດາຂະແໜງການ ແລະ ທ້ອງຖິ່ນ ຈັດຕັ້ງປະຕິບັດຕົວຈິງ ສຳລັບໂຄງການສຳປະທານດ້ານບໍ່ແຮ່ ແລະ ດ້ານກະສິກຳ

ທີ່ໄດ້ອະນຸມັດໄປແລ້ວນັ້ນປະກອບມີ ໂຄງການລົງທຶນດ້ານແຮ່ທາດ ອະນຸມັດ 470 ໂຄງການ, ໃນເນື້ອທີ່ສຳປະທານ 36.300 ກວ່າກິໂລຕາແມັດ, ມີມູນຄ່າທັງໝົດປະ ມານ 5,9 ຕື້ ໂດລາສະຫະລັດ ໃນນັ້ນ ສູນກາງອະນຸມັດ 204 ໂຄງການ, ທ້ອງຖິ່ນອະນຸມັດ 266 ໂຄງການ. ສ່ວນໂຄງການລົງທຶນ ປູກຢາງພາລາ ແລະ ໄມ້ວິກ ຖືກອະນຸມັດທັງໝົດ 212 ໂຄງການ, ເນື້ອທີ່ສຳປະທານ 574.500 ກວ່າເຮັກຕາ, ລວມມູນຄ່າ ການລົງທຶນ 1,65 ຕື້ໂດລາສະຫະລັດ.
ຂໍ້ມູນດັ່ງກ່າວໄດ້ຮັບການລາຍງານຈາກ ທ່ານ ສົມດີ ດວງດີ ລັດຖະມົນຕີວ່າການກະຊວງແຜນການ ແລະ ການລົງທຶນ ຢູ່ໃນກອງປະຊຸມສະໄໝ ສາມັນເທື່ອທີ 6 ຂອງສະພາແຫ່ງຊາດຊຸດທີ VII ໃນວັນທີ 9 ທັນວາ 2013 ກ່ຽວກັບສະພາບການ ໂຈະການພິຈາລະນາ ແລະ ອະນຸມັດໂຄງການ ລົງທຶນໃໝ່ ສຳລັບການຊອກຄົ້ນ ແລະ ສຳຫລວດແຮ່ທາດ, ການປູກຢາງພາລາ ແລະ ໄມ້ວິກໃນຂອບເຂດທົ່ວປະເທດ ພ້ອມນີ້ ທ່ານຍັງໄດ້ຍົກໃຫ້ເຫັນ ເຖິງສະພາບການແຈກຢາຍໂຄງການ ຕາມແຕ່ລະພາກ ຂອງປະເທດ ຊຶ່ງຢູ່ພາກເໜືອ ມີ 249 ໂຄງການ ໄດ້ສຳປະທານເນື້ອທີ່ທັງໝົດ 21.442 ກິໂລຕາແມັດ ໃນນັ້ນແຂວງທີ່ມີການລົງ ທຶນຫລາຍກວ່າໝູ່ແມ່ນ ແຂວງວຽງຈັນ ມີ 60 ໂຄງການ ແລະ ແຂວງອຸດົມໄຊ 17 ໂຄງການ; ພາກກາງ ມີທັງໝົດ 167 ໂຄງການ, ໄດ້ສຳປະທານເນື້ອທີ່ທັງໝົດ 7.580 ກວ່າກິໂລຕາແມັດ ໃນນັ້ນແຂວງທີ່ມີມູນຄ່າການລົງທຶນຫລາຍທີ່ສຸດແມ່ນ ແຂວງຄຳ ມ່ວນ ແລະ ພາກໃຕ້ ມີທັງໝົດ 54 ໂຄງການ, ໄດ້ສຳປະທານເນື້ອທີ່ 7.297 ກິໂລຕາແມັດ ຊຶ່ງແຂວງທີ່ມີມູນຄ່າການລົງທຶນ ຫລາຍກວ່າໝູ່ແມ່ນ ແຂວງເຊກອງ. ສຳລັບໂຄງການສຳປະທານຢາງພາລາ ແລະ ໄມ້ວິກຢູ່ແຂວງພາກເໜືອມີ 130 ໂຄງການ, ມີເນື້ອທີ່ 269.000 ກວ່າເຮັກຕາ, ພາກກາງ ມີ 48 ໂຄງການ, ມີເນື້ອທີ່ 152.800 ກວ່າເຮັກຕາ ແລະ ພາກໃຕ້ມີ 36 ໂຄງການ, ມີເນື້ອທີ່ 152.500 ກວ່າເຮັກຕາ.

ທ່ານລັດຖະມົນຕີວ່າການກະຊວງແຜນການ ແລະ ການລົງທຶນ ໄດ້ໃຫ້ຮູ້ອີກວ່າ: ໂດຍອີງຕາມ 8 ມາດຖານຂອງການ ກວດກາໂຄງການສຳປະທານ ດ້ານແຮ່ທາດ ແລະ ກະສິກຳ ຄະນະສະເພາະກິດໄດ້ພ້ອມກັນຈັດຕັ້ງປະຕິບັດ 2 ຂັ້ນຕອນຄວບຄູ່ ກັນໄປຄື: ກວດກາດ້ານເອກະສານ ໂດຍສະເພາະ ແມ່ນສັນຍາ ແລະ ນິຕິກຳຕ່າງໆ ພ້ອມທັງລົງກວດກາຕົວຈິງຢູ່ພາກສະໜາມ ໃນບາງໂຄງການ ສາມາດຈັດປະເພດໄດ້ໃນເບື້ອງຕົ້ນຄື: ປະເພດແຂງ ມີ 14 ໂຄງການ, ເທົ່າກັບ 6,83%, ປະເພດກາງ 92 ໂຄງການ ເທົ່າກັບ 44,88%, ປະເພດອ່ອນມີ 56 ໂຄງການ ເທົ່າກັບ 27,32%, ປະເພດອ່ອນຫລາຍທີ່ຈະສະເໜີຂັ້ນເທິງຍົກເລີກ 8 ໂຄງການຍັງບໍ່ທັນໄດ້ຈັດປະເພດມີ 23 ໂຄງການໃໝ່ຍັງບໍ່ທັນຈັດປະເພດ 9 ໂຄງການ ແລະ ໂຄງການທີ່ສະເໜີສົ່ງຄືນລັດຖະບານ 3 ໂຄງການ. ສ່ວນໂຄງການສຳປະທານຢາງພາລາ ແລະ ໄມ້ວິກ ນັ້ນ, ໂດຍປະຕິບັດຕາມ 5 ມາດຖານສາມາດ ຈັດປະເພດໄດ້ຄື: ປະເພດແຂງ ມີ 9 ໂຄງການ, ເທົ່າກັບ 25,71%, ປະເພດກາງ 11 ໂຄງການ ເທົ່າກັບ 31,24%, ປະເພດອ່ອນມີ 11 ໂຄງການ ເທົ່າກັບ 31,24% ຂອງຈຳນວນໂຄງການທັງໝົດ ແລະ ປະເພດອ່ອນຫລາຍທີ່ຈະສະເໜີຂັ້ນເທິງຍົກເລີກມີ 4 ໂຄງ ການ./.

 

 

 


ການເລືອກຕັ້ງ ສສຊ ຊຸດທີVII

ບົດຄວາມ ກ່ຽວກັບ ຢາເສບຕິດ
You are here: