ລາຍການ

ເຂົ້າສູ່ລະບົບ



ຈຳນວນຜູ້ເຂົ້າເບິ່ງເວັບໄຊ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
ເລີ່ມນັບຈາກວັນທີ 28/02/2011

ສປປ ລາວ ມີຄວາມຈຳເປັນ ໃນການສ້າງກົດໝາຍວ່າດ້ວຍ ການປົກປ້ອງຜົນກະທົບ ຈາກການນຳເຂົ້າສິນຄ້າ

ຂປລ. ສະມາຊິກສະພາແຫ່ງຊາດ ໃຫ້ທັດສະນະວ່າ ສປປ ລາວ ແມ່ນມີຄວາມຈຳເປັນທີ່ສຸດ ໃນການສ້າງກົດໝາຍ ວ່າດ້ວຍ ການປົກປ້ອງ ຜົນກະທົບຈາກການນຳເຂົ້າ ສິນຄ້າຂຶ້ນມາ ເພື່ອເປັນບ່ອນອີງໃນການຈັດຕັ້ງປະຕິບັດ ກ່ຽວກັບ ການຄຸ້ມຄອງ ແລະ ປົກປ້ອງການນຳເຂົ້າສິນຄ້າ ເພື່ອເປັນການປົກປ້ອງຜູ້ຜະລິດສິນຄ້າພາຍໃນ ທັງເປັນການຮັກສາ ສະຖຽນລະພາບ ທາງດ້ານເສດຖະກິດ.

ທ່ານ ປຣະຈິດ ໄຊຍະວົງ ສະມາຊິກ ສະພາແຫ່ງຊາດ ເຂດ 1 ນະຄອນຫລວງວຽງຈັນ, ໃຫ້ສຳພາດ ໃນວາລະດຳເນີນ ກອງປະຊຸມ ສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ໃນວັນທີ 30 ຕຸລາ ນີ້ ວ່າ: ​ປະເທດລາວ ເປັນປະເທດນ້ອຍ, ການຜະລິດຍັງບອບບາງ ແລະ ບໍ່ທັນແຂງແຮງ ເພາະສະນັ້ນ, ການເປີດການຄ້າເສລີອາຊຽນ ແນ່ນອນແລ້ວວ່າ ມັນບໍ່ມີຂອບເຂດຂອງ ການຄ້າ-ການຂາຍ ໝາຍຄວາມວ່າ ເຮົາບໍ່ສາມາດຢຸດຢັ້ງ ການນຳເຂົ້າສິນຄ້າ ຈາກຕ່າງປະເທດໄດ້ ແລະ ອີງຕາມກອບ ຂອງອົງການການຄ້າໂລກ ພວກເຮົາບໍ່ສາມາດຜູກຂາດ ຫລື ຈຳກັດສິນຄ້າໃດໜຶ່ງ ທີ່ບໍ່ໃຫ້ເຂົ້າມາໄດ້ ຍ້ອນແນວນັ້ນ ມັນຈຶ່ງມີຄວາມຈຳເປັນຕ້ອງໄດ້ ສ້າງກົດໝາຍຂຶ້ນມາ ເພື່ອກຳນົດວ່າ ສິນຄ້າປະເພດໃດຄວນໃຫ້ ນໍາເຂົ້າມາ ແລະ ສິດປົກປ້ອງຜູ້ຜະລິດ ພາຍໃນແນວໃດ ເພື່ອໃຫ້ເຂົາເຈົ້າ ບໍ່ໄດ້ຮັບຄວາມເສຍຫາຍ ຈາກການນຳເຂົ້າ ສິນຄ້າທີ່ເພີ່ມຂຶ້ນ. ຖ້າຫາກວ່າກົດໝາຍສະບັບນີ້ ຖືກນຳໄປຈັດຕັ້ງປະຕິບັດ, ບັນດາຜູ້ຜະລິດພາຍໃນ ກໍຈະມີບ່ອນອີງວ່າ ຜະລິດຕະພັນຂອງເຂົາເຈົ້າ ທີ່ຜະລິດອອກມາ ຈະບໍ່ມີລາຄາສູງ, ສາມາດແຂ່ງຂັນກັບເຂົາໄດ້ແນວໃດ, ເຂົາເຈົ້າຄວນເຮັດແນວໃດ ເພື່ອປົກປ້ອງເວລາຖືກຜົນກະທົບ ຈາກສິນຄ້ານໍາເຂົ້າ, ພ້ອມທັງເປັນການກະຕຸ້ນ ໃຫ້ເຂົາເຈົ້າສາມາດ ຜະລິດສິນຄ້າ ທີ່ມີຄຸນນະພາບ ແລະ ສາມາດສົ່ງອອກໄດ້. ທ່ານ ບົວທອງ ອຸແສງຄຳ ເຂດເລືອກຕັ້ງທີ 2 ແຂວງຜົ້ງສາລີ ກ່າວວ່າ: ຖ້າພວກເຮົາ ບໍ່ມີການປົກປ້ອງ ການນຳເຂົ້າສິນຄ້າ ກໍຈະເຮັດໃຫ້ ການຜະລິດສິນຄ້າຢູ່ພາຍໃນ ແຂ່ງຂັນກັບສິນຄ້າ ຕ່າງປະເທດໄດ້ຍາກ ເພາະວ່າ ສປປ ລາວ ຫາກໍລິເລີ່ມກ່ຽວກັບ ການຫັນເປັນອຸດສາຫະກຳ ໃນຂະນະທີ່ປະເທດເພື່ອນບ້ານ ໄດ້ກາຍເປັນປະເທດ ອຸດສາຫະກຳແລ້ວ. ສະນັ້ນ, ພວກເຮົາຕ້ອງມີການປົກປ້ອງ ຜູ້ຜະລິດພາຍໃນ ເພື່ອໃຫ້ເຂົາເຈົ້າມີຄວາມເຊື່ອໝັ້ນ ໃນການດຳເນີນທຸລະກິດ ແລະ ການຜະລິດ. ຖ້າຫາກກົດໝາຍສະບັບນີ້ ໄດ້ຖືກຮັບຮອງ ແລະ ປະກາດໃຊ້ ຢ່າງເປັນທາງການແລ້ວ ການຜະລິດພາຍໃນ ກໍຈະໄດ້ຮັບການສົ່ງເສີມ, ມີຄວາມໝັ້ນທ່ຽງ ແລະ ມີທ່າກ້າວຂະຫຍາຍຕົວ, ພ້ອມກັນນັ້ນ ຊີວິດການເປັນຢູ່ຂອງປະຊາຊົນລາວ ກໍຈະໄດ້ຮັບການພັດທະນາ ໄປພ້ອມໆກັນ.

ທ່ານ ສາຍສະໝອນ ຄົມທະວົງ ເຂດເລືອກຕັ້ງທີ 6 ແຂວງຫລວງພະບາງ ກ່າວວ່າ: ສປປ ລາວແມ່ນມີຄວາມຈຳເປັນ ຕ້ອງໄດ້ນຳເຂົ້າສິນຄ້າ ຈາກພາຍນອກ (ສິນຄ້າທີ່ລາວ ບໍ່ສາມາດຜະລິດໄດ້ ຫລື ຜະ ລິດໃນປະລິມານໜ້ອຍ ແລະ ຄຸນພາບບໍ່ທັນສູງ) ເພື່ອມາພັດທະນາ ປະເທດຊາດ ແຕ່ວ່າການນຳເຂົ້າດັ່ງກ່າວ, ຄວນຢູ່ໃນກອບກົດໝາຍ ທີ່ຈະປົກປ້ອງຜູ້ຜະລິດພາຍໃນ, ຖ້າຫາກວ່າພວກເຮົາ ບໍ່ມີການປົກປ້ອງຜູ້ຜະລິດພາຍໃນ ກໍຈະເຮັດໃຫ້ການຜະລິດພາຍໃນ ບໍ່ມີການຂະຫຍາຍຕົວ, ເສດຖະກິດກໍຈະອ່ອນແອ. ເພາະສະນັ້ນ, ສປປ ລາວ ຕ້ອງຮີບຮ້ອນປະກາດ ນຳໃຊ້ກົດໝາຍ ວ່າດ້ວຍການປົກປ້ອງຜົນກະທົບ ຈາກການນຳເຂົ້າສິນຄ້າ ເພື່ອປົກປ້ອງຜົນປະໂຫຍດ ຂອງປະຊາຊົນລາວທັງຊາດ.

 



ການເລືອກຕັ້ງ ສສຊ ຊຸດທີVII


ການເລືອກຕັ້ງ ສສຊ ຊຸດທີ VIII

 

You are here: