ລາຍການ

ເຂົ້າສູ່ລະບົບ



ຈຳນວນຜູ້ເຂົ້າເບິ່ງເວັບໄຊ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
ເລີ່ມນັບຈາກວັນທີ 28/02/2011

ຄະນະສສຊ ເພດຍິງຊຸດທີ VIII ປະຕິບັດພາລະບົດບາດຂອງຕົນ

ວັນ​ທີ 8 ມີນາ ​ແມ່ນ​ເຫດການ​ການ​ເມືອງ​ທີ່​ສຳຄັນ ​ເປັນ​ຂີດ​ໝາຍ​ແຫ່ງ​ໄຊຊະນະ​ອັນ​ພື້ນຖານ​ຂອງ​ຂະ​ບວນການ​ຕໍ່ສູ້​ຂອງ​ແມ່ຍິງ​ໂລກ​ເພື່ອ​ປົກ​ປ້ອງສິດຜົນປະ​ໂຫຍ​ດອັນ​ຊອບ​ທຳ​ໃຫ້​ແກ່​ແມ່ຍິງ​ຊາວ​ຜູ້​ອອກ​ແຮງ​ງານ ​ແລະ​ເປັນ​ວັນ​ລະນຶກ​ເຖິງ​ການ​ຕໍ່ສູ້​ຂອງ​ແມ່ຍິງ​ເພື່ອ​ປົດ​ປ່ອຍ​ຕົນ​ເອງ ​ແລະ​ທວງ​ໃຫ້​ມີ​ສິດສະ​ເໝີ​ພາບ​ປະຊາທິປະ​ໄຕ​ຄື​ກັບ​ເພດ​ຊາຍ.

ເນື່ອງ​ໃນ​ໂອກາດ​ສະຫຼອງ​ວັນ​ແມ່ຍິງ​ສາກົນ ຄົບຮອບ 107 ປີ (8 ມີນາ 1910-8 ມີນາ 2017) ທ່ານ ນາງ ທັດ​ສະ​ດາ​ພອນ ​ແສງ​ສຸລິຍາ, ປະທານ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ສະພາ​ແຫ່ງ​ຊາດ​ຊຸດ​ທີ VIII ​ໄດ້ກ່າວ​ຕໍ່​ໜັງສືພິມ “ຜູ້​ແທນ​ປະຊາຊົນ” ສຽງ​ຂອງ​ສະພາ​ແຫ່ງ​ຊາດ ​ແລະ​ສະພາ​ປະຊາຊົນ​ທ້ອງ​ຖິ່ນວ່າ: ຂ້າພະ​ເຈົ້າ​ມີ​ຄວາມ​ພາກພູມ​ໃຈ​ເປັນ​ຢ່າງ​ຍິ່ງ​ທີ່​ໄດ້​ຕາງໜ້າ​ໃຫ້​ກຳມະການ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ, ສະມາຊິກ​ສະພາ​ປະຊາຊົນ​ເພດ​ຍິງ​ຂັ້ນ​ແຂວງ ທີ່​ປະຈຳ​ຢູ່​ສູນ​ກາງ ​ແລະ​ເຂດ​ເລືອກ​ຕັ້ງ​ໃນ​ຂອບ​ເຂດ​ທົ່ວ​ປະ​ເທດ​ມາມີ​ຄວາມ​ເຫັນ​ເນື່ອງ​ໃນ​ໂອກາດ​ວັນ​ທີ 8 ມີນາ, ວັນ​ແມ່ຍິງ​ສາກົນ​ຊຶ່ງ​ທ່ານ​ໄດ້​ກ່າວ​ເນັ້ນ​ວ່າ: ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ແມ່ນ​ກົງຈັກ​ໜຶ່ງ​ຂອງ​ຄະນະ​ປະຈຳ​ສະພາ​ແຫ່ງ​ຊາດ, ປະ​ຕິ​ບັດ​ພາລະ​ບົດບາດ​ເປັນ​ເສນາ​ທິການ​ໃຫ້​ຄະນະ​ປະຈຳ​ສະພາ​ແຫ່ງ​ຊາດ, ຕິດຕາມ​ກວດກາ​ການ​ປະຕິບັດ​ກົດໝາຍ, ​ແຜນ​ຍຸດ​ທະ​ສາດ ​ແລະ​ນະ​ໂຍບາຍ​ກ່ຽວ​ກັບ​ການ​ເຊື່ອມ​ທັດສະນະ​ບົດບາດ​ຍິງ-ຊາຍ, ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ແມ່ຍິງ, ການ​ສົ່ງ​ເສີມ​ຄວາມ​ກ້າວໜ້າ​ຂອງ​ແມ່ຍິງ, ວຽກ​ງານ​ປົກ​ປ້ອງ​ພັດທະນາ​ແມ່ຍິງ ​ແລະ​ເດັກ, ຊຸກຍູ້​ການ​ປະຕິບັດ​ສົນທິສັນຍາ​ສາກົນ ​ແລະ​ສົນທິສັນຍາ​ກ່ຽວ​ກັບ​ແມ່ຍິງ.

ຕະຫຼອດ​ໄລຍະ​ຕໍ່ສູ້​ປົດ​ປ່ອຍ​ຊາດ ​ແມ່ຍິງ​ໄດ້​ປະກອບສ່ວນ​ຢ່າງ​ຕັ້ງໜ້າ ​ແລະສາມາດ​ຍາດ​ໄດ້​ເອກະລາດ​ໃນ​ ວັນ​ທີ 2 ທັນວາ 1975  ຊຶ່ງ​ເປັນ​ມື້​ທີ່​ສະພາ​ປະຊາຊົນ​ສູງ​ສຸດ ຊຸດ​ທີ I ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ ມີ​ຜູ້​ແທນ​ປະຊາຊົນ ຈຳນວນ 45 ທ່ານ, ​ໃນ​ນັ້ນ​ມີ​​ເພດຍິງ 4 ທ່ານ ກວມ 8.8 %; ສະພາ​ປະຊາຊົນ​ສູງ​ສຸດ ຊຸດ​ທີ II ມີ​ຜູ້​ແທນ ຈຳນວນ 79 ທ່ານ, ຍິງ 5 ທ່ານ ກວມ 6.3 %; ສະພາ​ປະຊາຊົນ​ສູງ​ສຸດ ຊຸດ​ທີ III ມີ​ຜູ້​ແທນ ຈຳນວນ 85 ທ່ານ, ຍິງ 8 ທ່ານ ກວມ 9.4%; ສະພາ​ແຫ່ງ​ຊາດ ຊຸດ​ທີ IV ມີ​ຜູ້​ແທນ 99 ທ່ານ, ຍິງ 21 ທ່ານ, ກວມ 21.2%; ສະພາ​ແຫ່ງ​ຊາດ​ຊຸດ​ທີ V ມີ​ຜູ້​ແທນ 109 ທ່ານ, ຍິງ 25 ທ່ານ ກວມ 23%, ສະພາ​ແຫ່ງ​ຊາດ ​ຊຸດ​ທີ VI ມີ​ຜູ້​ແທນ 115 ທ່ານ, ຍິງ 29 ທ່ານ ກວມ 25.2%; ສະພາ​ແຫ່ງ​ຊາດ​ ຊຸດ​ທີ VII ມີ​ຜູ້​ແທນ 132 ທ່ານ, ຍິງ 33 ທ່ານ ກວມ 25%; ສະພາ​ແຫ່ງ​ຊາດ​ ຊຸດ​ທີ VIII ມີ​ຜູ້​ແທນ 149 ທ່ານ, ຍິງ 41 ທ່ານ ກວມ 27.5%.

​ທ່ານ​ປະທານ​ຄະນະ​ ສສຊ ​ເພດ​ຍິງ ຊຸດ​ທີ VIII ​ໄດ້​ກ່າວ​ຕື່ມ​ວ່າ: ໂດຍ​ອີງ​ໃສ່​ທິດ​ທາງ​ການ​ເຄື່ອນ​ໄຫວ​ຂອງ​ສະພາ​ແຫ່ງ​ຊາດ ຊຸດ​ທີ V ວ່າ​ດ້ວຍ​ການ​ສືບ​ຕໍ່​ປັບປຸງ​ຄວາມ​ສາມາດ​ຂອງ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ທັງ​ນີ້​ກໍ​ເພື່ອ​ຍົກ​ລະດັບ​ຄວາມ​ກ້າວໜ້າ​ຂອງ​ແມ່ຍິງ​ລາວ​ບັນດາ​ເຜົ່າ​ໃຫ້​ນັບ​ມື້​ນັບ​ຫຼາຍ​ຂຶ້ນ​ໃນ​ຂົງ​ເຂດ​ການ​ເມືອງ, ​ເສດຖະກິດ, ວັດທະນະທຳ-ສັງຄົມ ​ໃຫ້​ໄດ້​ທັງ​ດ້ານ​ປະລິມານ ​ແລະ​ຄຸນ​ນະພາ​ບສູງ​ຂຶ້ນ​ເປັນ​ລຳດັບ. ດັ່ງ​ນັ້ນ, ​ໃນ​ຕົ້ນ​ສະ  ​ໄໝ​ຂອງ​ສະພາ​ແຫ່ງ​ຊາດ​ ຊຸດ​ທີ V ພາຍ​ໃຕ້​ຄວາມ​ຄິດ​ລິ​ເລີ່​ມ ​ແລະ​ຊີ້​ນຳ​ຂອງ​ທ່ານ ນາງ ປານີ ຢາ​ທໍ່​ຕູ້ ຊຶ່ງ​ເວລາ​ນັ້ນ​ເປັນ​ຮອງ​ປະທານ​ສະພາ​ແຫ່ງ​ຊາດ, ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ​ໄດ້​ຮັບ​ການ​ສ້າງ​ຕັ້ງ​ຂຶ້ນ ມີ​ສະມາຊິກ​ສະພາ​ແຫ່ງ​ຊາດ​ເພດ​ຍິງ 25 ທ່ານ ກວມ 23%. ມາ​ຮອດ​ທ້າຍ​ສະ​ໄໝ​ສະພາ​ແຫ່ງ​ຊາດ​ຊຸດ​ທີ VI ​ໄດ້​ມີ​ການ​ປັບປຸງ​ກົດໝາຍ​ວ່າ​ດ້ວຍ​ສະພາ​ແຫ່ງ​ຊາດ ​ແລະ​ຖືກ​ຮັບຮອງ, ປະກາດ​ໃຊ້​ໃນ​ວັນ​ທີ 15 ທັນວາ 2010 ​ໄດ້​ລະບຸ​ສະຖານະ​ພາບ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ​ເຂົ້າ​ໃນ​ກົດໝາຍ​ດັ່ງກ່າວ; ນັບ​ແຕ່​ສະພາ​ແຫ່ງ​ຊາດ​ຊຸດ​ທີ VII ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ​ໄດ້​ເຄື່ອນ​ໄຫວ​ຕາມ 4 ພາລະ​ບົດບາດ​ຂອງ​ສະພາ​ແຫ່ງ​ຊາດ​ຄື: ​ເປັນ​ຕົວ​ແທນ​ແຫ່ງ​ສິດຜົນ​ປະ​ໂຫຍ​ດອັນ​ຊອບ​ທຳ​ຂອງປະຊາຊົນ, ພາລະບົດບາດ​ນິຕິບັນຍັດ, ຕົກລົງ​ບັນຫາ​ສຳຄັນ​ພື້ນຖານ​ຂອງ​ຊາດ, ຕິດຕາມ​ກວດກາ; ມາ​ຮອດ​ສະພາ​ແຫ່ງ​ຊາດ ຊຸດ​ທີ VIII ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ​ໄດ້​ສືບ​ຕໍ່​ຈັດ​ຕັ້ງ​ປະຕິບັດ 3 ພາ​ລະ​ບົດບາດ​ຂອງ​ສະພາ​ແຫ່ງ​ຊາດ.

ຕະຫຼອດ​ໄລຍະ 1 ປີຜ່ານມາ ສະມາຊິກ​ສະພາ​ແຫ່ງ​ຊາດ​ເພດ​ຍິງ​ໄດ້​ປະກອບສ່ວນ​ເຄື່ອນ​ໄຫວ​ວຽກ​ງານ​ຢ່າງ​ຕັ້ງໜ້າ​ຄຽງ​ບ່າ​ຄຽງ​ໄຫຼ່ກັບສະມາຊິກ​ສະພາ​ແຫ່ງ​ຊາດ​​ເພດ​ຊາຍ ​ແລະ​ປະຕິບັດ​ຕາມ​ພາລະ​ບົດບາດ​ຂອງ​ຕົນ​ດ້ວຍ​ຄວາມ​ຮັບຜິດຊອບ​ສູງ, ພ້ອມ​ນັ້ນ, ​ໄດ້​ຈັດ​ກອງ​ປະຊຸມ​ຄົບ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ຄັ້ງ​ທີ 1 ຂອງ​ສະພາ​ແຫ່ງ​ຊາດ ຊຸດ​ທີ VIII ; ຈັດ​ສຳມະ​ນາ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ແລະ​ສະມາຊິກ​ສະພາ​ປະຊາ​ຊົນ​​ເພດ​ຍິງ​ຂັ້ນ​ແຂວງ​; ​ເຂົ້າ​ຮວ່ມກອງ​ປະຊຸມ​ສະມັດຊາ​ລັດຖະສະພາ​ລະຫວ່າງ​ຊາດ​ອາ​ຊຽນ​ໄອ​ປາ, ກອງ​ປະຊຸມ​ອົງການ​ສະຫະ​ພັນ​ລັດຖະສະພາ​ສາກົນ, ກອງ​ປະຊຸມ​ສະມັດຊາ​ລັດຖະສະພາ​ບັນ​ດາ​ປະ​ເທດ​ທີ່​ໃຊ້​ພາສາ​ຝຣັ່ງ. ​ເພື່ອ​ເຮັດ​ສຳ​ເລັດ​ໜ້າ​ທີ່​ທີ່​ຂັ້ນ​ເທິງ​ມອບ​ໝາຍ​ໃຫ້ ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ​ໄດ້​ວາງ​ວິ​ໄສ​ທັດຮອດ​ປີ 2030, ຍຸດ​ທະ​ສາດ ​ແຕ່​ປີ 2016-2025 ​ແລະ​ແຜນການ 5 ປີ​ຂອງ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ​ສະພາ​ແຫ່ງ​ຊາດ ຊຸດ​ທີ VIII (2016-2020) ​ແລະ​ທິດ​ທາງ​ແຜນການ ປີ 2017.

​​ໃນ​ໂອກາດ​ວັນ​ແມ່ຍິງ​ສາກົນ, ວັນ​ທີ 8 ມີນາ 2017 ນີ້, ຂ້າພະ​ເຈົ້າຂໍ​ສະ​ແດງ​​ເຄົາລົບ​ຮັກ ​ແລະ​ຮູ້​ບຸນຄຸນຢ່າງ​ສູງ​ຕໍ່​ການ​ນຳພັກ, ລັດຖະບານ​ເວົ້າ​ລວມ, ​ເວົ້າ​ສະ​ເພາະ​ການ​ນຳ​ຂອງ​ສະພາ​ແຫ່ງ​ຊາດ​ ​ຊຶ່ງ​ຍາມ​ໃດ​ກໍ​ໄດ້​ເອົາ​ໃຈ​ໃສ່ສ້າງ​ທຸກ​ເງື່ອນ​ໄຂ ​ແລະ​ບຳລຸງ​ສ້າ​ງສະ​ມາຊິກ​ສະພາ​ແຫ່ງ​ຊາດ​ເພດ​ຍິງ​ໃຫ້​ມີ​ຄວາມ​ເຕີບ​ໃຫຍ່​ຂະຫຍາຍຕົວ ທັງ​ສ້າງ​ຄວາມ​ເຊື່ອ​ໝັ້ນ ​ແລະ​ຖື​ສຳຄັນ​ຕໍ່ວຽກ​ງານ​ຂອງ​ສະ​ມາ​ຊິກ​ສະພາ​ແຫ່ງ​ຊາດ​ເພດ​ຍິງ​ໃນ​ການ​ເຄື່ອນ​ໄຫວ​ຕາມ​ພາລະ​ບົດບາດ, ສິດ ​ແລະ​ໜ້າ​ທີ່​ຂອງ​ຕົນ​ໄດ້​ຮັບ​ຜົນສຳ​ເລັດ​ຕະຫຼອດ​ມາ ພ້ອມ​ນີ້​ຂໍ​ອວຍພອນ​ໃຫ້​ບັນດາ​ທ່ານ​ການ​ນຳ​ພັກ, ລັດຖະບານ, ​ແມ່ຍິງ​ລາວ​ບັນດາ​ເຜົ່າ​ໃນ​ຂອບ​ເຂດ​ທົ່ວ​ປະ​ເທດ​ ​ພ້ອມ​ກັນສະ​ເຫຼີ​ມສະຫຼອງ​ວັນ​ແມ່ຍິງ​ສາກົນ ວັນ​ທີ 8 ມີນາ ຄົບຮອບ 107 ປີ​ໃຫ້​ມີ​ຂະ​ບວນການ​ຟົດ​ຟື້ນ​ມ່ວນ​ຊື່ນ.

 



ການເລືອກຕັ້ງ ສສຊ ຊຸດທີVII


ການເລືອກຕັ້ງ ສສຊ ຊຸດທີ VIII

 

You are here: