ລາຍການ

ເຂົ້າສູ່ລະບົບ



ຈຳນວນຜູ້ເຂົ້າເບິ່ງເວັບໄຊ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
ເລີ່ມນັບຈາກວັນທີ 28/02/2011

ທ່ານປະທານສະພາແຫ່ງຊາດ ເຂົ້າຮ່ວມກອງປະຊຸມ ປະທານລັດຖະສະພາ ເພດຍິງຂອງໂລກ

(ສພຊ) ລະຫວ່າງວັນ​ທີ 12-13 ທັນ​ວາຜ່ານ​ມາ​, ​ທ່ານ ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ​ໄດ້​ນໍາພາ​ຄະນະ​ຜູ້​ແທນ​ຂັ້ນ​ສູງຂອງສະພາ​ແຫ່ງ​ຊາດ ​ເຂົ້າ​ຮ່ວມ​ກ​ອງປະຊຸມປະທານ​ລັດຖະສະພາເພດ​ຍິງຂອງ​ໂລກ ເຊິ່ງ​​ໄຂ​ຂຶ້ນ​ທີ່ນະຄອນຫລວງອາ​ບູດາ​ບີ, ປະ​ເທດ ສະຫະລັດ ອາຫລັບ ​ເອມິ​ເຣດ ຫລືຢູເອອີ (UAE),

ພາຍ​ໃຕ້ຫົວ​ຂໍ້ “ຮ່ວມ​ກັນ​ສ້າງ​ອະນາ​ຄົດ” (United for Shaping the Future) ໂດຍມີ​ປະ​ທານ​ລັດຖະສະພາ​ທີ່​ເປັນ​ເພດ​ຍິງ​ຈາກ 34 ປະ​ເທດ​ໃນ​ທົ່ວ​ໂລກ ​​ນໍາພາ​ຄະນະຜູ້​ແທນ​ຂັ້ນ​ສູງ​ຂອງ​ຕົນ​ເຂົ້າ​ຮ່ວມ; ພ້ອມ​ກັນ​ນັ້ນ,  ​ກໍຍັງ​ມີ​ຄະນະ​ຜູ້​ແທນລັດຖະບານ, ອົງການຈັດ​ຕັ້ງ​ສາກົນ, ນັກວິທະຍາສາດ, ນັກ​ຄົ້ນຄວ້າ, ອົງການ​ຈັດ​ຕັ້ງ​ທາງ​ສັງຄົມ, ຕົວ​ແທນ​ນັກທຸລະກິດ​ທີ່​ມີຊື່​ສຽງ​ຂອງ​ໂລກ ​ແລະຂອງ​ພາກ​ພື້ນ ​ເຂົ້າ​ຮ່ວມ​ຢ່າງ​ຫລວງ​ຫລາຍ.

​ກອງ​ປະຊຸມ​ໄຂ​ຂຶ້ນ​ໃນ​ຕອນ​​ເຊົ້າ​ຂອງ​ວັນ​ທີ 12 ທັນວາ ​ໂດຍ​ການ​ເປັນ​ປະທານ​ຮ່ວມ​ຂອງ​ທ່ານ ດຣ. ນາງ ອາ​ມານ ອານ​ ກູ​ໄບຊີ (Amal AL Qubaisi) ປະທານ​ສະພາ​ແຫ່ງ​ຊາດ ແຫ່ງຢູ່ເອອີ ​ແລະທ່ານ ຊາ​ເບີ ຊາວດູຣິ (Saber Chowdhury) ປະ​ທານ​ສະຫະພັນລັດຖະສະພາ​ສາກົນ ຫລື ໄອພີຢູ (IPU); ນອກ​ນັ້ນ, ການ​ນໍາ​ຂັ້ນ​ສູງ​ຂອງ​ລັດຖະບານ​ປະ​ເທດ​ເຈົ້າພາບ, ຮອງປະ​ທານຄະນະກໍາມາ​ທິການ​ເອີ​ຣົບ ​ແລະ​ເລຂາທິການ​ໃຫຍ່ສະຫະ​ປະຊາ​ຊາດ ກໍມີ​ຄໍາ​ເຫັນ​ຕໍ່​ພິທີເປີດ.

​          ໂດ​ຍອີງ​ໃສ່​ຫົວ​ຂໍ້​ໃຫຍ່ຂອງ​ກອງ​ປະຊຸມ, ປະທານ​ລັດຖະສະພາ​ເພດ​ຍິງ ​ແລະຄະນະ​ຜູ້​ແທນ ​ໄດ້​ຮ່ວມ​ກັນ​ປຶກສາ​ຫາລື, ​ແລກປ່ຽນ​ຄໍາ​ຄິດ​ຄໍາ​ເຫັນ ​ແລະທັດ​ສະ​ນະ​ ກັບ​ຜູ້​ຊ່ຽວຊານ, ຕົວ​ແທນ​ລັດຖະບານ, ​ອົງການຈັດ​ຕັ້ງ​ສາກົນ ​ແລະນັກ​ທຸ​ລະ​ກິດ ​ໃນ​ຫລາຍ​ບັນຫາ​ທີ່ມີຄວາມ​ສົນ​ໃຈ ​ແລະຄວາມ​ເປັນ​ຫ່ວງ​​ເປັນ​ໃຍລວມຂອງ​ໂລກ ເຊິ່ງ​ມີ​ຫົວ​ຂໍ້: ບັນດາ​ທ່າ​ອຽງທີ່​ກໍາ​ນົດທິດທາງ​ຂອງ​ໂລກ, ຮ່ວມ​ກັນ​ສ້າງສັນ​ຕິ​ພາບ ​ແລະຄວາມ​ໝັ້ນຄົງ, ຮ່ວມ​ກັນຄໍ້າປະກັນ​ຜົນ​ສໍາ​ເລັດ​ທາງ​ດ້ານ​ເສດຖະກິດ​ເພື່ອ​ຄົນ​ຮຸ່ນສືບ​ທອດ, ຮ່ວມ​ກັນ​ປົກ​ປັກ​ຮັກສາ​ຄວາມ​ສົມ​ບູນຂອງ​ໂລກ ​ແລະບໍລິ ຫານ​ຄວາມ​ປະນີ​ປະນ​ອມ, ການ​ລວມ​ເອົາ​ທັດສະນະ​ຂອງ​ແມ່ຍິງ ​ແລະ​ໄວ​ໜຸ່ມ, ນະ​ວັດຕະ​ກໍາ​ທີ່​ຖ່າຍ​ທອດ​ໄດ້, ການຮ່ວມກັນ​ກ້າວ​ໄປ​ສູ່​ສັງຄົມ​ທີ່​ມີ​ສ່ວນ​ຮ່ວມ ​ແລະການ​ປະຕິ​ຮູບ​ລັດຖະສະພາເພື່ອ​ອະນາຄົດ​ທີ່​ດີກ​ວ່າ​; ການ​ປຶກສາ​ຫາລື ​ໄດ້ຈັດ​ຂຶ້ນ​ໂດຍ​ການ​ແບ່ງ​ເປັນ​ກຸ່ມ​ສົນທະນາ​ຕາມ​ຫົວ​ຂໍ້ ເຊິ່ງ​ບັນດາ​ປະທານ​ລັດຖະສະພາ​ເພດ​ຍິງ​ໄດ້​ເລືອກ​​ເອົາ​ຫົວ​ຂໍ້​ທີ່​ຕົນ​ສົນ​ໃຈ​ຂຶ້ນ​ມາ​ແລກປ່ຽນ.

​ປະທານ​ສະພາ​ແຫ່ງ​ຊາດ​ລາວ ​ໄດ້​ເຂົ້າ​ຮ່ວມ​ປຶກສາ​ຫາລື ​ແລະມີ​ຄໍາ​ເຫັນ​ຕໍ່​ກອງ​ປະຊຸມ​ໃນຫົວ​ຂໍ້ “ຮ່ວມ​ກັນ​ປົກ​ປັກ​ຮັກສາ​ຄວາມ​ສົມ​ບູນຂອງ​ໂລກ” ເຊິ່ງ​ທ່ານ​ໄດ້​ເນັ້ນ​ໜັກ​ຄວາມ​ສໍາຄັນ​ຂອງ​ການ​ປົກ​ປັກ​ຮັກສາສິ່ງ​ແວດ​ລ້ອມທໍາ​ມະ​ຊາດ ກໍຄື​ການ​ສະກັດ​ກັ້ນ ​ແລະການ​ຮັບ​ມືການ​ປ່ຽນ​ແປງ​ຂອງ​ດິນ​ຟ້າ​ອາກາດ ​ໂດຍ​ຜ່ານ​ກົນ​ໄກ ​ແລະຂໍ້​ລິ​ເລີ່​ມ ຕ່າງໆຂອງ​ສາກົນ ​ເປັນ​ຕົ້ນ​ແມ່ນ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ (SDGs) ​ແລະສັນຍາ​ປາຣີ ວ່າດ້ວຍ ການ​ປ່ຽນ​ແປງ​ດິນ​ຟ້າ​ອາກາດ ເຊິ່ງ​ປະຊາ​ຄົມ​ໂລກ​ໄດ້​ຮັບຮອງ​​ເອົາ​ໃນ​ປີ 2015; ​ທ່ານ​ປະທານ​ສະພາ​ແຫ່ງ​ຊາດ ​ໄດ້​ຍົກ​ໃຫ້​ເຫັນ​ຄວາມ​ພ້ອມ​ຂອງ ສປປລາວ ທີ່​ຈະ​ຮ່ວມ​ກັບ​ວົງ​ຄະນາ​ຍາດ​ສາກົນ ​ໃນ​ການຈັດ​ຕັ້ງ​ປະຕິບັດ​ວຽກ​ງານ​ດັ່ງກ່າວ ເຊິ່ງ​ສະ​ແດງ​ອອກ​ໂດຍ​ຜ່ານ​ການຜັນ​ຂະຫຍາຍ​ເປົ້າໝາຍ​ການ​ພັດທະນາ​ແບບ​ຍືນ​ຍົງ​ຕ່າ​ງໆ ​ເຂົ້າ​​ໃນ​ແຜນ​ພັດທະນາ​ເສດ ຖະກິດ​-ສັງຄົມ​ແຫ່ງ​ຊາດ​ຂອງ​ຕົນ, ​ໄດ້​ເຂົ້າ​ຮ່ວມ​ເປັນ​ພາຄີ ​ແລະ​​ໃຫ້​ສັດຕະຍາບັນ​ແກ່ສັນຍາ​ປາຣີວ່າ​ດ້ວຍການ​ປ່ຽນ​ແປງ​ດິນ​ຟ້າ​ອາກາດ, ​ໄດ້​ຜັນ​ຂະຫຍາຍ​ເນື້ອ​ໃນ​ຈິດ​ໃຈ​ຂອງ​ວຽກ​ງານ​ຂ້າງ​ເທິງ​ເຂົ້າ​ໃນ​ນິຕິ​ກໍາ​ພາຍ​ໃນ​ຂອງ​ຕົນ ຕາມ​ຄວາມ​ເໝາະ​ສົມ ​ແລະຄວາມ​ຮຽກຮ້ອງ​ຕ້ອງການ​ຕົວ​ຈິງ. ນອກຈາກ​ນີ້, ປະທານສະພາ​ແຫ່ງ​ຊາດ​ ກໍໄດ້​ແລກ ປ່ຽນ​ບົດຮຽນ​ທີ່ ສປປລາວ ມີ​ທ່າ​ແຮງ ​ແລະປະສົບ​ການ​ໃນ​ການ​ຄຸ້ມ​ຄອງ ​ແລະນໍາ​ໃຊ້​ຊັບພະຍາກອນນໍ້າແບບ​ຍືນ​ຍົງ ​ໂດຍ​ການ​ປະສົມ​ປະສານ​ຫລາຍ​ຈຸດ​ໃນ​ການ​ນໍາ​ໃຊ້​ນໍ້າ​ເຂົ້າກັນ ​ແລະ​ໂດຍ​ການ​ມີ​ສ່ວນ​ຮ່ວມ​ຂອງ​ປະຊາຊົນ; ໜຶ່ງ​​ໃນ​ບັນຫາ​ສໍາຄັນ​ກໍແມ່ນ​ການ​ພັດທະນາ​ໄຟຟ້າ​ນໍ້າຕົກ ເຊິ່ງຖື​ວ່າ​ເປັນ​ແຫລ່ງພະ​ລັງງານ​ທີ່​ສະອາດ, ​ເປັນ​ມິ​ດຕໍ່​ສິ່ງ​ແວດ​ລ້ອມ, ຫລຸດຜ່ອນ​ການ​ປ່ອຍ​ອາຍ​ພິດ​ເຮືອນ​ແກ້ວ ພ້ອມ​ທັງ​​ເປັນ​ການ​ບໍລິຫານ​ນໍ້າ​ເພື່ອ​ການ​ກະສິກໍາ ​ແລະ​ການ​ບໍລິ​ໂພ​ກນໍາ​ອີກ. ບົດຮຽນ​ດັ່ງ​ກ່າວ ຖື​ເປັນ​ບົດຮຽນ​ທີ່​ດີ ​ແລະ​ໄດ້​ຮັບ​ຄວາມ​ສົນ​ໃຈ​ຈາກ​ທີ່​ປະຊຸມ, ​ໃນ​ຕອນ​ທ້າຍ​ ປະທານສະພາ​ແຫ່ງ​ຊາດ​ ​ໄດ້​​ເນັ້ນ​ເຖິງ​ຄວາມ​ສໍາຄັນ​ທີ່​ລັດຖະສະພາ ​ກໍຄືລັດຖະບານ​ຂອງ​ປະ​ເທດ​ຕ່າງໆ ຕ້ອງ​ໄດ້​ຫັນ​ເອົາ​ເປົ້າ​ໝາຍ​ການ​ພັດທະນາ​​ແບບ​ຍືນ​ຍົງ ກໍຄື​ເນື້​ອ​ໃນ​ຈິດ​ໃຈ​ຂອງ​ສັນຍາ​ປາຣີ ​ເຂົ້າ​ເປັນ​ວຽກ​ງານ, ​ແຜນການ​ ກໍຄື​ນິຕິ​ກໍາ​ພາຍ​ໃນ​ຂອງ​ຕົນ​.

ກອງ​ປະຊຸມ​ອັດ​ລົງ​ໃນ​ຕອນ​ຄໍ່າ​ຂອງ​ວັນ​ທີ 13 ທັນວາ ​ໂດຍ​​ໄດ້​ຮັບຮອງ​ເອົາ​ຖະ​ແຫລງການ​ອາ​ບູດາ​ບີ ທີ່​ແນໃສ່ສ້າງ​ກົນ​ໄກ ​ແລະມາດ​ຕະການ​ໃນ​ການຈັດ​ຕັ້ງ​ປະຕິບັດວຽກ​ງານ​ຕ່າງໆ​ໃນ​ຂັ້ນ​ຕໍ່​ໄປ.

ກອງ​ປະຊຸມ​ປະ​ທານລັດຖະສະພາ​ເພດ​ຍິງ​ຂອງ​​ໂລກ ​ໄຂ​ຂຶ້ນ​ທຸກໆສອງ​ປີ ເຊິ່ງ​ຄັ້ງ​ນີ້​ເປັນ​ຄັ້ງ​ທີ 11 ​ແລ້ວ ​ໂດຍ​ບັນດາ​ປ​ະ​ເທດ​ສະມາຊິກ​ຂອງ​ສະຫະພັນ​ລັດຖະສະພາສາກົນ ຜັດປ່ຽນ​ກັນ​ເປັນ​ເຈົ້າ​ພາບ.

 



ການເລືອກຕັ້ງ ສສຊ ຊຸດທີVII


ການເລືອກຕັ້ງ ສສຊ ຊຸດທີ VIII

 

You are here: